L Südtirol per l'Aministrazion provinziela

Na aministrazion che funziunea te na maniera plu scëmpla

I bujëns al'aministrazion publica ie for plu y plu cumplichei. Acioche chësta cumplessità ne vënie nia sëurandata ala zitadines y ai zitadins, ie l fin dl'aministrazion provinziela de Südtirol chël de fé a na maniera che si servijes sibe l plu daujin che la va al zitadin, da ntënder y da pudëi ruvé permez.

Tl ann 2025 ie unida nvieda via, per chësc fin, la scumenciadiva "Scemplificon deberieda", n pruzes de partezipazion che à trat ite diretamënter cunlauradëures, respunsabli, assoziazions y dantaldut zitadines y zitadins, a chëi che n ti à damandà cie che n pudëssa miuré cuncretamënter.

Resultac dla scumenciadiva

Da chësc pruzes ie nasciudes truepa prupostes cuncretes, dala scemplificazions dla pruzedures aministratives a nfurmazions plu tleres, nchin a soluzions digiteles che possa sauridé la vita da uni di y miuré l servisc ala zitadines y ai zitadins.

L ie unì valutà che l ie mesun mëter n droa 838 de chësta prupostes, che ie śën la fundamënta cuncreta per l miuramënt atif dl'aministrazion provinziela.

Proscimi svilups

La prupostes abinedes adum ie unides dates inant ai Departimënc cumpetënc. Te chësta sëntes vënieles śën lauredes ora var per var, cun l fin de arjonjer miuramënc cuncrec tla vita da uni di nchin ala fin dla legislatura y de mëter n droa l 90% dla prupostes valutedes positivamënter.

Prim resultac cuncrec

N valgun resultac mpurtanc on bele arjont, dantaldut cun l portal nuef per i zitadins myCIVIS.

Chësc sauridea l azes ai servijes dl'Aministrazion, abina adum la nfurmazions plu mpurtantes y smëndra l mpëni per la zitadines y i zitadins, che muessa mé dé ju i dac un n iede.

Sambën resta nce l cuntat persunel cun l'Aministrazion provinziela. L ie unì metù su passa 40 DigiPoint sëura dut l raion dla Provinzia, che ie ponc de cuntat per la zitadines y i zitadins y reprejënta na nterfazion fisica danter l mond digitel y n'aministrazion sun mesura di zitadins.

Deplù nfurmazions

N rengraziamënt particuler ti va a duta la persones che à fat pea pra la scumenciadiva. L'aministrazion resta sambën a despusizion, nce ora dla campania Scemplificon deberieda, per cunsëies, dumandes y prupostes de miuramënt.

Chi che ulëssa nfurmazions plu avisa n con'dla situazion atuela dla prupostes o di proiec bele realisei possa abiné duc i details tla relazion anuela dl'aministrazion sun mesura dl zitadin:

Bürgernahe Verwaltung - Jahresbericht 2026 (Download PDF)